भंवरखेडे येथे मोठया प्रमाणात भेसळयुक्त दूध नष्ट : अन्न व औषध प्रशासनाची कारवाई..
जळगाव (प्रतिनिधी) :- धरणगाव तालुक्यातील भवरखेडे येथे घातक रसायनांपासून दूध तयार करून ते ग्राहकांना विकणाऱ्या एका तरूणाला अटक करण्यात आली. ही कारवाई अन्न व औषध प्रशासन आणि पोलिसांच्या पथकाने सोमवारी मध्यरात्री केली. या प्रकरणी संशयिताच्या विरोधात गुन्हा दाखल झाला असून, सुमारे मोठ्या प्रमाणात भेसळयुक्त दूध नष्ट करण्यात आले आहे.
धरणगाव तालुक्यात भवरखेडा येथे एक तरूण आरोग्यास अपायकारक असलेल्या रसायनांचा वापर करून भेसळयुक्त दुध तयार करून ग्राहकांना राजरोसपणे विकत होता. त्याबाबतची माहिती जळगाव येथील अन्न व औषध प्रशासनाचे अन्न सुरक्षा अधिकारी यांना मिळाली होती पोलिसांच्या मदतीने सोमवारी मध्यरात्री भवरखेडा येथे धाड टाकण्यात आली. तेव्हा एक तरुण रसायनांचा वापर करून दूध तयार करत असल्याचे आढळून आले. त्याला पोलिसांनी ताब्यात घेऊन चौकशी केली असता त्याने गुन्ह्याची कबुली दिली. अन्न सुरक्षा अधिकारी यांनी दिलेल्या तक्रारीवरून संशयित सोमनाथ याच्या विरोधात गुन्हा दाखल करण्यात आल्यानंतर त्याच्याजवळील सर्व रसायने जप्त करण्यात आली.
