जळगाव (प्रतिनिधी) : शहरातील कांचननगर भागात रविवारी रात्री सुमारे १० वाजेच्या सुमारास पूर्ववैमनस्यातून दोन गटात वाद झाला. या वादात झालेल्या गोळीबारात १ जण ठार तर २ जण जखमी झाल्याची माहिती मिळाली आहे. जखमींवर शासकीय वैद्यकीय महाविद्यालय येथे उपचार सुरू आहेत. यामुळे जळगाव शहरात खळबळ उडाली असून पोलीस संशयित आरोपींचा शोध घेत आहेत.
काही दिवसांपासून गुन्हेगारांनी शहरात थैमान माजवले आहे. एमआयडीसी परिसरातील गोळीबाराची घटना ताजी असताना आता रविवारी दि. ९ रोजी रात्री १० वाजेच्या सुमारास कांचननगर भागात दोन गटांमध्ये पूर्ववैमनस्यातून वाद निर्माण झाला. वाद चिघळत जाऊन त्याचे रूपांतर थेट गोळीबारात झाले. या गोळीबारात आकाश युवराज बाविस्कर (वय २८, रा. कांचन नगर, जळगाव), गणेश रविंद्र सोनवणे (वय २६) व तुषार सबसिंग सोनवणे (वय २६, दोन्ही रा. कांचन नगर, जळगाव) असे तिघे गंभीर जखमी झाले होते. त्या पैकी एकाचा मृत्यू झाल्याचे कळते.घटनास्थळावर नागरिकांची गर्दी झाली होती.
घटनेची माहिती मिळताच शनिपेठ पोलीस घटनास्थळी दाखल झाले. प्राथमिक चौकशीत गोळीबार करणाऱ्यांमध्ये दोन जणांची नावे समोर येत असून अधिकृत माहिती पोलीसांकडून अद्याप समोर आलेली नाही. तर एल सी बी ची टीम गुन्हेगाराच्या शोधार्थ रवाना झाली असल्याची माहिती मिळत आहे. दरम्यान गोळीबारामध्ये तरुण मृत्युमुखी पडल्याने जळगाव शहरात खळबळ उडाली आहे. सदर आरोपींचा शोध पोलीस घेत आहे.
