जळगाव – शहरातील शिवकॉलनी स्टॉपजवळ रस्ता ओलांडताना एका अज्ञात वाहनाने महसूल विभागाच्या कर्मचाऱ्याला चिरडल्याची धक्कादायक घटना आज, रविवारी (१ जून) दुपारी २:३० वाजेच्या सुमारास घडली. या भीषण अपघातात विशाल सोनार असे मयत झालेल्या व्यक्तीचे नाव असून, अपघात घडल्यानंतर वाहन चालक वाहन घेऊन तेथून फरार झाला.
अपघाताचे स्वरूप इतके भीषण होते की, विशाल सोनार यांना गंभीर दुखापत झाली आणि त्यांचा जागीच मृत्यू झाला. घटनेची माहिती मिळताच स्थानिक पोलीस देखील तात्काळ घटनास्थळी दाखल झाले.या संदर्भात अधिक माहिती अशी की, विशाल सोनार हे शिवकॉलनीजवळ रस्ता ओलांडत होते. त्याचवेळी वेगाने आलेल्या एका अज्ञात वाहनाने त्यांना चिरडले. हा अपघात दुपारी अडीच वाजता घडल्यानंतर, वाहन चालक न थांबता घटनास्थळावरून पसार झाला.मयत विशाल सोनार यांच्या खिशात त्यांचे ओळखपत्र आढळून आले. त्यावरून ते महसूल विभागात शिपाई म्हणून कार्यरत असल्याचे समोर आले. या माहितीने परिसरात हळहळ व्यक्त होत आहे. पोलिसांनी तात्काळ मृतदेह एका खाजगी वाहनातून जिल्हा शासकीय वैद्यकीय रुग्णालयात दाखल करण्यात आला.
दरम्यान, या घटनेची माहिती मिळाल्यानंतर मयत विशाल सोनार यांच्या नातेवाईकांनी देखील रुग्णालयात धाव घेतली असून, त्यांच्यावर दुःखाचा डोंगर कोसळला आहे. या प्रकरणी पोलीस ठाण्यात अज्ञात वाहनचालकावर गुन्हा दाखल करण्याचे काम सुरू होते. सीसीटीव्हीच्या माध्यमातून पोलीसांकडूनफरार वाहन चालकाचा शोध घेण्यासाठी पुढील तपास सुरू करण्यात आला आहे.
