जळगाव – महानगरपालिका निवडणुकीच्या रणधुमाळीत उमेदवारी अर्ज मागे घेण्याच्या शेवटच्या दिवशी महायुतीने विरोधकांचा अक्षरशः धुव्वा उडवला आहे. राजकीय चाणक्यनीतीचा वापर करत महायुतीने चक्क १२ जागांवर बिनविरोध विजय मिळवून ऐतिहासिक कामगिरी केली आहे. यात भारतीय जनता पक्ष आणि शिवसेना (शिंदे गट) यांनी प्रत्येकी ६ जागा जिंकत विजयाचा समसमान वाटा उचलला आहे. ७५ जागांच्या महापालिकेत आता केवळ ६३ जागांसाठी प्रत्यक्ष मतदान होणार असून, मतदानापूर्वीच महायुतीने ‘डझनभर’ विजयांचा टप्पा ओलांडल्याने कार्यकर्त्यांमध्ये प्रचंड जल्लोष पाहायला मिळत आहे.
प्रारंभीच भाजपच्या उज्वला बेंडाळे (प्रभाग १२ ब) यांनी बिनविरोध निवडीचा श्रीगणेशा केला होता. त्यानंतर गुरुवारी माघारीच्या पहिल्या दिवशी शिवसेनेचे मनोज चौधरी, प्रतिभा देशमुख आणि आमदार पुत्र डॉ. गौरव सोनवणे यांची बिनविरोध निवड निश्चित झाली. आज, शुक्रवारी (२ जानेवारी) माघारीच्या अंतिम दिवशी राजकीय घडामोडींना वेग आला. सकाळी प्रभाग १९ (अ) मधून राष्ट्रवादी काँग्रेस (शरद पवार गट) च्या उमेदवार सरला सोनवणे यांनी अर्ज मागे घेतल्याने शिवसेनेच्या रेखा चुडामण पाटील यांचा विजय सुकर झाला. पाठोपाठ दुपारी प्रभाग ७ (क) मधून आमदार राजूमामा भोळे यांचे सुपुत्र विशाल भोळे यांच्या विरोधातील अपक्षांनी माघार घेतल्याने त्यांच्या विजयावर शिक्कामोर्तब झाले.शेवटच्या तासांत ‘बिनविरोध’ची लाट दुपारच्या सत्रात महायुतीने आपला आक्रमक पवित्रा कायम राखला. प्रभाग ७ (अ) मध्ये शिवसेना (ठाकरे गट) च्या उमेदवार जयश्री हिवराळे यांनी माघार घेतल्याने भाजपच्या दीपमाला काळे बिनविरोध झाल्या. प्रभाग २ (अ) मध्ये शिवसेनेच्या सागर सोनवणे यांच्या विरोधातील ५ अपक्षांनी माघार घेतली. तसेच, प्रभाग १६ (अ) मधून भाजपचे डॉ. विश्वनाथ खडके, १३ (क) मधून वैशाली पाटील, ७ (ब) मधून अंकिता पाटील आणि प्रभाग १९ (ब) मधून शिवसेनेचे गणेश उर्फ विक्रम सोनवणे यांची बिनविरोध निवड अधिकृतपणे निश्चित झाली आहे.
अचूक रणनीतीमुळे महायुतीने मतदानापूर्वीच डझनभर जागा खिशात घातल्या आहेत. या विजयामुळे महापालिका प्रांगणात गुलालाची उधळण आणि फटाक्यांची आतषबाजी करत समर्थकांनी एकच जल्लोष केला. आता उर्वरित ६३ जागांसाठी १५ जानेवारी रोजी प्रत्यक्ष मतदान होणार असून, महायुतीने मिळवलेल्या या सुरुवातीच्या घवघवीत यशामुळे विरोधकांसमोर मोठे आव्हान उभे राहिले आहे.
महायुतीचे बिनविरोध विजयी उमेदवार :-
विजयी उमेदवार भाजप (०६) – उज्वला बेंडाळे (१२ ब), विशाल भोळे (७ क), दीपमाला काळे (७ अ), डॉ. विश्वनाथ खडके (१६ अ), वैशाली पाटील (१३ क), अंकिता पाटील (७ ब)
शिवसेना (०६) – डॉ. गौरव सोनवणे (१८ अ), मनोज चौधरी (९ अ), प्रतिभा देशमुख (९ ब), रेखा पाटील (१९ अ), सागर सोनवणे (२ अ), विक्रम सोनवणे (१९ ब )
