जळगाव – शहरातील सम्राट कॉलनी परिसरात रविवारी दुपारी दोन तरुणांमध्ये झटापट झाली. यात धीरज दत्ता हिवराळे आणि कल्पेश वसंत चौधरी यांनी एकमेकांवर धारदार शस्त्राने हल्ला केला. या हल्ल्यात धीरज याच्या छातीत खोलवर वार झाल्याने तो गंभीर जखमी झाला. त्याला तातडीने जिल्हा सामान्य रुग्णालयात दाखल करण्यात आले, परंतु उपचारादरम्यान त्याचा मृत्यू झाला. दुसरीकडे, कल्पेश चौधरी याच्या डोक्यावर आणि मानेवर गंभीर जखमा झाल्या असून, त्याच्यावर रुग्णालयात उपचार सुरू आहेत.
पोलिसांनी दिलेल्या माहितीनुसार, धीरज हिवराळे आणि कल्पेश चौधरी यांच्यात पूर्वीपासून वैमनस्य होते. रविवारी दुपारी सम्राट कॉलनी परिसरात दोघे समोरासमोर आले असता त्यांच्यात पुन्हा वाद निर्माण झाला. वादाचे पर्यवसान हाणामारीत झाले. दोघांनीही धारदार शस्त्राने एकमेकांवर वार केले. या हल्ल्यात धीरज याच्या छातीत खोलवर वार झाल्याने तो रक्ताच्या थारोळ्यात पडला. स्थानिकांनी तातडीने त्याला जिल्हा सामान्य रुग्णालयात दाखल केले, परंतु डॉक्टरांनी उपचारादरम्यान त्याला मृत घोषित केले. कल्पेश याच्या डोक्यावर आणि मानेवर गंभीर जखमा झाल्या असून, त्याची प्रकृती चिंताजनक आहे.घटनेची माहिती मिळताच पोलिसांनी तातडीने घटनास्थळी धाव घेतली. उपविभागीय पोलीस अधिकारी संदीप गावीत आणि एमआयडीसी पोलीस ठाण्याचे निरीक्षक बबन आव्हाड यांच्यासह पोलिसांचा फौजफाटा जिल्हा रुग्णालयात तैनात करण्यात आला. घटनेची माहिती कळताच नातेवाईक आणि मित्रांनी जिल्हा रुग्णालयात गर्दी केली. मयताच्या नातेवाईकांनी रुग्णालयात आक्रोश केला.
या घटनेमुळे सम्राट कॉलनी परिसरात तणावाचे वातावरण निर्माण झाले होते. पोलिसांनी परिस्थिती नियंत्रणात ठेवण्यासाठी अतिरिक्त कुमक तैनात केली आहे. घटनेचा सखोल तपास सुरू आहे. दोषींवर कठोर कारवाई केली जाईल. तसेच, नागरिकांनी शांतता राखावी आणि कोणत्याही अफवांवर विश्वास ठेवू नये, असे आवाहन पोलिसांनी केले आहे.
