मुक्ताईनगरमध्ये भीषण अपघात : पती – पत्नीचा  दुर्दैवी मृत्यू, चिमुकली गंभीर जखमी..

मुक्ताईनगर (प्रतिनिधी) : तालुक्यातील एका भीषण रस्ते अपघातात नवरा-बायकोचा जागीच दुर्दैवी मृत्यू झाला असून त्यांची लहान मुलगी गंभीर जखमी झाली आहे. या हृदयद्रावक घटनेमुळे परिसरात शोककळा पसरली आहे.

मिळालेल्या प्राथमिक माहितीनुसार, संबंधित कुटुंब दुचाकीवरून प्रवास करत असताना मागून येणाऱ्या आयशर वाहनाने जोरदार धडक दिली. धडक इतकी भीषण होती की पती-पत्नीचा घटनास्थळीच मृत्यू झाला, तर त्यांच्यासोबत असलेली चिमुकली मुलगी गंभीर जखमी झाली. तिला तातडीने जवळच्या रुग्णालयात दाखल करण्यात आले असून तिची प्रकृती चिंताजनक असल्याची माहिती आहे.

या अपघातामागे धक्कादायक कारण समोर आले आहे. संबंधित आयशर वाहनाला केळी वाहतुकीसाठी नियमबाह्य पद्धतीने अतिरिक्त लोखंडी पट्ट्या (अँगल/रॉड) लावण्यात आल्या होत्या. या बाहेर आलेल्या लोखंडी पट्ट्यांमुळे धडक अधिक घातक ठरल्याचे प्राथमिक तपासात निष्पन्न झाले आहे.

घटनेची माहिती मिळताच पोलिसांनी घटनास्थळी धाव घेत पंचनामा केला. विशेष म्हणजे, या प्रकरणात पोलिसांनी केवळ निष्काळजीपणे वाहन चालविण्याचा गुन्हा दाखल न करता गंभीर दखल घेत आयशर चालकाविरुद्ध सदोष मनुष्यवधाचा गुन्हा दाखल केला आहे. निष्काळजीपणा आणि बेकायदेशीर बदलांमुळे दोन निष्पाप जीवांचा बळी गेल्याने पोलिसांनी कडक भूमिका घेतल्याचे स्पष्ट झाले आहे.

या घटनेमुळे वाहतूक नियमांचे उल्लंघन आणि मालवाहतूक वाहनांमध्ये करण्यात येणारे बेकायदेशीर बदल किती जीवघेणे ठरू शकतात, याचा पुन्हा एकदा प्रत्यय आला आहे. नागरिकांनी आणि वाहनचालकांनी नियमांचे पालन करणे अत्यावश्यक असल्याचे आवाहनही पोलिस प्रशासनाकडून करण्यात आले आहे. दरम्यान, जखमी चिमुकलीवर उपचार सुरू आहे.