धरणगाव तालुक्यातील जिल्हा परिषद शिक्षक निलंबित..

धरणगाव – तालुक्यातील कवठळ येथील जिल्हा परिषद शाळेतील शिक्षक सुरेश चंद्रा सोनवणे यांना वारंवार गैरहजेरी व शाळेत मद्यपानाच्या अवस्थेत येण्याच्या गंभीर तक्रारींमुळे अखेर निलंबित करण्यात आले आहे. जिल्हा परिषदेच्या मुख्य कार्यकारी अधिकारी मिनल करनवाल यांनी दिलेल्या निर्देशानुसार गट विकास अधिकारी, पंचायत समिती धरणगाव यांनी शुक्रवार, दि. १० ऑक्टोबर रोजी निलंबन आदेश जारी करण्यात आला आहे.दरम्यान या बाबत प्राप्त तक्रारीची मुख्य कार्यकारी अधिकारी मिनल करनवाल यांनी तत्काळ दखल घेत ही कारवाई केली आहे.

दिनांक ६ ऑक्टोबर रोजी कवठळ येथील जिल्हा परिषद शाळा बंद अवस्थेत असल्याचे ग्रामस्थांच्या निदर्शनास आले. शाळेला कुलूप असल्याची माहिती संतप्त ग्रामस्थांनी गट शिक्षण अधिकारी, धरणगाव यांना दिल्यानंतर तत्काळ चौकशी सुरू करण्यात आली. केंद्र प्रमुखांनी संबंधित शिक्षकास नोटीस बजावली असता, ते शाळेत अनुपस्थित असल्याचे आढळून आले.

यानंतर गट शिक्षण अधिकारी, केंद्र प्रमुख चांदसर व केंद्र प्रमुख पाळधी यांनी ९ ऑक्टोबर रोजी प्रत्यक्ष शाळेस भेट देऊन चौकशी केली. चौकशीदरम्यान ग्रामस्थ, पालक, व्यवस्थापन समितीचे पदाधिकारी व सहशिक्षकांनी संबंधित शिक्षकाविरुद्ध वारंवार मद्यपान करून शाळेत येणे, वर्ग अध्यापन न करणे व शाळेतून अनधिकृतरीत्या अनुपस्थित राहणे अशा गंभीर तक्रारी नोंदवल्या.या घटनेचा व्हिडिओ सोशल मीडियावर व्हायरल झाल्यानंतर मुख्य कार्यकारी अधिकारी मिनल करनवाल यांनी तातडीने दखल घेत, संबंधित शिक्षकाविरुद्ध कठोर कारवाईचे निर्देश दिले.

त्यांच्या आदेशानुसार, गट विकास अधिकारी, पंचायत समिती धरणगाव यांनी १० ऑक्टोबर रोजी शिक्षक सुरेश चंद्रा सोनवणे यांना तत्काळ प्रभावाने निलंबित केले आहे.