जळगाव (प्रतिनिधी) – वर्षानुवर्ष साचलेल्या त्याच त्या तक्रारी जिल्हा परिषदेची संबंधित असलेल्या कार्यालया अंतर्गत येणाऱ्या विविध शाखा कार्यालयांना नागरिक व कर्मचारी यांना वारंवार माराव्या लागणाऱ्या फेऱ्या यापासून आता संबंधित कार्यालय व नागरिक तसेच कर्मचाऱ्यांना मुक्ती मिळणार आहे. जिल्हा परिषदेच्या मुख्य कार्यकारी अधिकारी मिनल करनवाल यांच्या अभिनव संकल्पनेतून दर महिन्यातून दोन वेळा मुख्य कार्यकारी अधिकाऱ्यांसह सर्व विभाग प्रमुख यांच्या समवेत तालुका स्तरावर तक्रार निवारण दिन घेण्यात येणार आहे. यातून सर्व प्रकारच्या तक्रारी चे जागच्या जागी निराकरण करण्यात येणार आहे. या अभिनव योजनेमुळे एक प्रकारे प्रशासन आपल्या दारी याचा प्रत्यय नागरिकांना येणार आहे.
शासकीय कार्यालय म्हटले की वर्षानुवर्षाच्या प्रलंबित तक्रारी विविध प्रकारच्या निर्णयाच्या फायलींसाठी माराव्या लागणाऱ्या चकरा त्यातून होणारा मनस्ताप असा अनुभव कित्येकदा सामान्य नागरिकांसह कर्मचाऱ्यांना येत असतो. नांदेड जिल्हा परिषदेच्या मुख्य कार्यकारी अधिकारी पदावरून जळगाव जिल्हा परिषदेच्या मुख्य कार्यकारी अधिकारी पदावर नव्यानेच हजर झालेल्या मिनल करनवाल यांनी हजर झाल्यानंतर सुरुवातीच्या काळातच संबंधित विभागांचा आढावा घेऊन वर्षानुवर्षाच्या साचलेल्या तक्रारींचे निराकरण करण्याचा निर्णय घेतला आहे. यातूनच त्यांनी तालुकास्तरावर महिन्यातून दोन वेळा तक्रार निवारण दिन घेण्याचा व प्राप्त तक्रारींचा जागच्या जागी निपटारा करण्याचा निश्चय केला आहे. प्रत्येक महिन्याच्या दुसऱ्या व चौथ्या मंगळवारी मुख्य कार्यकारी अधिकाऱ्यांसह जिल्हा परिषदेचे सर्व विभाग प्रमुख तालुकास्तरावर जाणार असून तालुकास्तरावर तक्रार निवारण दिन घेणार आहेत.या तक्रार निवारण दिनात प्राप्त होणाऱ्या विविध प्रकारच्या प्रशासकीय तक्रारींवर साधक बाधक चर्चा करून त्या तक्रारींचे जागच्या जागी निराकरण करण्यात येणार आहे. यामुळे अनेक दिवस साच णाऱ्या तक्रारी, विविध प्रकारच्या समस्या या अत्यंत जलद पद्धतीने वेळच्यावेळी सोडवल्या जाणार आहेत. अत्यंत अभिनव उपक्रमाच्या माध्यमातून सामान्य नागरिक तसेच कर्मचाऱ्यांना विविध तक्रारींपासून तसेच वारंवार शासकीय कार्यालयात माराव्या लागणाऱ्या चकरा पासून मुक्ती मिळणार आहे. या उपक्रमामुळे प्रशासन आपल्या दारी सारख्या योजनेचा अनुभव नागरिकांना घेता येणार आहे.
