जळगाव – काँग्रेस पक्षातून निलंबन झाल्यानंतर दोनच दिवसात माजी खासदार डॉ. उल्हास पाटील आणि त्यांची कन्या डॉ. केतकी पाटील यांनी आज आपल्या समर्थकांसह भारतीय जनता पक्षात अधिकृत प्रवेश केला. मुंबई येथे भाजपचे प्रदेशाध्यक्ष चंद्रशेखर बावनकुळे यांच्या उपस्थितीत हा प्रवेश सोहळा पार पडला.
डॉ. उल्हास पाटील, डॉ. वर्षा पाटील, देवेंद्र मराठे, यांचे काँग्रेसमधून सहा वर्षांसाठी निलंबन करण्यात आले होते. यानंतर डॉ. पाटील यांनी पत्रकार परिषद घेऊन काँग्रेसवर टिकास्त्र सोडले होते. याप्रसंगी त्यांनी स्पष्टपणे आपली कन्या डॉ. केतकी पाटील या भाजपमध्ये प्रवेश करणार असून आपण देखील लवकरच निर्णय घेणार असल्याचे सांगितले होते. या अनुषंगाने आज बुधवार रोजी मुंबईत प्रवेश सोहळा पार पडला. यात डॉ. उल्हास पाटील, डॉ. केतकी पाटील, देवेंद्र मराठे, शैलेश राणे यांच्यासह अन्य मान्यवरांनी भारतीय जनता पक्षात प्रवेश घेतला. उपमुख्यमंत्री देवेंद्र फडणवीस, पक्षाचे प्रदेशाध्यक्ष चंद्रशेखर बावनकुळे, मंत्री गिरीश महाजन आदी नेत्यांनी यांचे स्वागत केले.
जळगाव जिल्ह्यात आधीच काँग्रेस पक्ष कमकुवत असताना डॉ. पाटील हे समर्थकांसह भाजपमध्ये प्रवेश केल्याने काँग्रेसमध्ये मोठी खिंडार पडले आहे.
