भुसावळ – शहरातील सोमनाथ नगरात बंद घर फोडून घरातून सोन्याचे चांदीचे दागिने आणि रोख रक्कम असा एकूण २८ लाख ५५ हजार रुपयांचा मुद्देमाल चोरून नेणाऱ्या चोरट्याला भुसावळ बाजारपेठ पोलिसांनी अटक केली आहे. चोरटा हा घरफोडी झालेल्या घरमालक वृद्धाचा जावईच निघाल्याने खळबळ उडाली आहे. दरम्यान कर्जबाजारातून त्याने ही चोरी केल्याची कबुली दिली आहे अशी माहिती जिल्हा पोलीस अधीक्षक महेश्वर रेड्डी यांनी दिली आहे. राजेंद्र शरद झांबरे रा. फेकरी ता. भुसावळ असे अटक केलेल्या चोरट्याचे नाव आहे.
मिळालेल्या माहितीनुसार, सोमनाथ नगर परिसरामध्ये अनिल हरी बऱ्हाटे (वय-६४) हे आपल्या पत्नीसह वास्तव्याला आहे. सोमवारी २ डिसेंबर रोजी त्यांच्या पुतण्याचे लग्नाच्या हळदीचा कार्यक्रम असल्याकारणामुळे बऱ्हाटे दाम्पत्य दुपारी २ वाजता घर बंद करून हळदीच्या कार्यक्रमात सहभागी झाला होता. त्यावेळी संशयित आरोपी राजेंद्र झांबरे हा देखील हळदीच्या कार्यक्रमात होता. त्याने बाहेर जाऊन येतो असे सांगून तो थेट सासरे अनिल बऱ्हाटे यांच्या घरी गेला. त्याने घराच्या मागची खिडकीची लोखंडी गज कापून घरात प्रवेश केला.
घरातून ३३ तोळे सोन्याचे दागिने आणि २ लाख ६० हजार रुपयांची रोकड असा एकूण २८ लाख ५५ हजारांचा मुद्देमाल चोरून नेला होता. या संदर्भात भुसावळ बाजारपेठ पोलीस ठाण्यात गुन्हा दाखल करण्यात आला होता.चौकशीला सुरुवात केली. यामध्ये संशयित आरोपी जावई राजेंद्र झांबरे हा कर्जबाजारी झालेला होता, अशी पोलिसांना माहिती मिळाली. त्यानुसार पोलिसांनी अधिक चौकशी केली असता राजेंद्र झांबरे याला ताब्यात घेतले. त्याला खाकी दाखवताच सासऱ्याच्या घरात चोरी केल्याची कबुली दिली. त्याच्याकडून चोरीला गेलेले संपूर्ण मुद्देमाल जप्त करण्यात आला आहे.
सदरची कार्यवाही पोलीस निरीक्षक राहुल वाघ, यांच्या मार्गदर्शनाखाली गुन्हे शोध पथकातील पोलीस अमंलदार पो. उपनिरी.मंगेश जाधव, पोहेका.विजय नेरकर, पोहेका निलेश चौधरी, पोहेका. रमण सुरळकर, पोहेका. उमाकांत पाटील, पोना. सोपान पाटील. पो. का. प्रशांत परदेशी, पो.का. भुषण.
