पारोळा (प्रतिनिधी): धुळेहून पारोळ्याकडे येणाऱ्या GJ-18 BV-8315 क्रमांकाच्या केमिकल टँकरचा सबगव्हाण टोलनाका येथे भीषण अपघात झाला. भरधाव वेगाने आलेल्या टँकरने पुढे उभ्या असलेल्या कंटेनरला मागून जोरदार धडक दिली. धडकेनंतर टँकरचा टायर फुटून आग लागली.
घटनेची माहिती मिळताच पारोळा येथील अग्निशमन दलाने घटनास्थळी धाव घेत आग आटोक्यात आणली. अपघातात केमिकल टँकरमधील दोघांचा दुर्दैवी मृत्यू झाला आहे.
प्रशासनाने खबरदारीचा उपाय म्हणून दोन्ही बाजूंची वाहतूक तात्पुरती बंद केली असून सुमारे अर्धा ते एक किलोमीटरपर्यंत वाहनांच्या रांगा लागल्या आहेत. परिस्थिती नियंत्रणात आणल्यानंतर वाहतूक लवकरच पूर्ववत करण्यात येणार असल्याची माहिती प्रशासनाने दिली आहे.टँकरमध्ये टोल्युइन डायआइसोसायनेट (TDI) हे रसायन होते. हे अत्यंत क्रियाशील (Highly Reactive) ॲरोमॅटिक डायआइसोसायनेट असून लवचिक पॉलीयुरेथेन फोम, कोटिंग्ज, ॲडेसिव्ह्ज आणि इलास्टोमर्स तयार करण्यासाठी कच्चा माल म्हणून वापरले जाते. मात्र, अधिकाऱ्यांनी दिलेल्या माहितीनुसार टँकरमधील केमिकल सुरक्षित असून कोणतीही गळती झालेली नाही.
पोलीस आणि संबंधित यंत्रणा घटनास्थळी दाखल असून अपघाताचे नेमके कारण शोधण्याचे काम सुरू आहे.
